Ахсынньы 11 күнүгэр Россияҕа Дьиэ кэргэн уонна Саха Өрөспүүбүлүкэтигэр Оҕо саас сылларыгар аналлаах уонна саха суругунан уус-уран литературата төрүттэммитэ 125 сылын көрсө «Чолбон Өй күрэһэ» II оонньуутун «Сахабэчээт» СӨ САТ «Чолбон» сурунаалын эрэдээксийэтэ партнердарын кытары тэрийбит күрэһэ Таатта улууһугар  буолла. Күрэс нэһилиэк библиотекаларыгар кэтэхтэн ыытылынна. 
   Күрэс дьон-сэргэ уус-уран литератураҕа уонна суруйааччылар олохторугар билиитигэр-көрүүтүгэр сигэнэр.

КҮРЭС СЫАЛА-СОРУГА

2.1. Дьиэ кэргэн болҕомтотун саха уус-уран литературатыгар тардыы;
2.2. Сахалыы уус-уран литератураны ааҕыыны көҕүлээһин;
2.3. Сахалыы ааҕар, литератураны таптыыр дьону булан түмүү, иитии уонна өйөөһүн

Оонньуу 4 түһүмэхтэн турар — «Суругунан уус-уран литератураны төрүттээччилэр», «Аҕа дойду Улуу сэриитин кэминээҕи литература», «Репрессияламмыт суруйааччылар», «Билиҥҥи кэм литературата».

Таатта улууһугар барыта 12 хамаанда: Чымынаайы, Даайа Амма, Чычымах, Уолба, Хара Алдан, Уус Таатта, Баайаҕа, Игидэй, Дьохсоҕон, Чөркөөх, Кыйы, Ытык Күөл нэһилиэктэриттэн барыта 36 киһи кытынна. Биһиги нэһилиэктэн Татьяна Юрьевна, Андрей Георгиевич, Никита Прокопьевтар бу күрэскэ кытыннылар. 

Таатта улууһугар саха литературатын билиини тургутар 4 түһүмэхтээх оонньууга:

1м — Вырдылиннар (Чөркөөх),

2м — Прокопьевтар (Чымынаайы),

3м — Лопатиннар(Игидэй) ыллылар.

Татьяна Юрьевна, Андрей Георгиевич, Никита Прокопьевтар дьиэ кэргэн  2 миэстэни ылбыттарынан эҕэрдэлиибит,  дириҥ билиигитинэн холобур буола сылдьыҥ, үлэҕитигэр ситиһиилэри баҕарабыт.