Төрүт сирим Чымнаайым!
                    К.И. Винокурова тыллара
                А.А. Новгородова мелодията

Үүнүү — быйаҥ өҥ буордаах
Сардааналаах кытыллаах,
Кылыгырас ыраас уулаах
Намыын Амма эбэлээх
Таптыыр дойдум Уус-Аммам!
Төрүт сирим Чымнаайым!

Ынах — сылгы үөрдээн үөскүүр
Хочо, налыы сирдэрдээх,
Оҕуруотун астара
Тиэрэ үүнэр бааһыналаах
Таптыыр дойдум Уус-Аммам!
Төрүт сирим Чымнаайым !

Үлэттэн дьолу билбит
Туруу дьоһун дьоннордоох,
Кэрэҕэ — үтүөҕэ талаһар
Эдэр — чэгиэн ыччаттаах
Таптыыр дойдум Уус-Аммам!
Төрүт сирим Чымнаайым !

Кэлэн ааспыт көлүөнэни
Үйэтитэр үгэстээх,
Инникитин даҕаны
Үүнэр — сайдар аналлаах
Таптыыр дойдум Уус-Аммам!
Төрүт сирим Чымнаайым!